Trimfesten i Hyen laurdag 06. mars 2004
Hyen Idrettslag har drive og driv som kjent godt på den idrettslege arena, men laget har og tradisjon for å vere ein kulturberar også etter det gamle, ikkje utvida kulturbegrepet. Sist på 70-talet og først på 80-talet var sistnemnde aktivitet temmeleg laber, og avgrensa seg i beste fall til reine dansefestar. Så fann dametrimmen med Kirsti Meyer Hope i spissen på å lage til ein skikkeleg bygdafest med program og mat og med litt svingom til slutt. Hyarane gjekk mann av huse for å få med seg denne nysoppstandne idrettslagsaktiviteten, og festen vart ein braksuksess. Dametrimmen utfordra då Gubbetrimmen om å lage til fest neste år, ei utfordring dei tok på strak arm. Sidan har denne trimfesten vorte ein årleg tradisjon, og har etterkvart innarbeidd seg som eitt av høgdepunkta i kulturlivet i bygda. Kåseri har vore fast innslag i programmet på desse festane, og opp gjennom åra har mange, tildels urøynde og uoppdaga talent fått høve til å prøve seg. Mykje av programinnslaga elles og har vore skrivne og dramatiserte lokalt. Ein tek utgangspunkt i lokale hendingar og karakterfigurar, ofte med stort hell og treffande poeng. Det er nok damene som legg mest arbeid og flid i programførebuinga, og har skapt mang ein godmodig satire med gubbane som rollefigurar. I år var det gubbane sin tur, og jammen kom dei velberga i mål denne gongen og, sjølv om delar av førebuinga vart reine sprintprosjektet med ein noko hektisk innspurt. Dei kunne by på song og musikk, sketsjar, kåseri og dansenummer for ein fullsett gymsal med eit lydhøyrt og positivt publikum. Matias Hope, Ola Holme og Eldar Rønnekleiv hadde dessutan laga massevis av kjempegod kompar som vart servert med diverse tilbehør. Etterpå var det dans til god musikk av "Rett & Slett" frå Førde. Vi gratulerer idrettslaget med nok ein vellukka og triveleg bygdafest, og gledar oss alt til damene skal i elden neste år!
Dei som av ulike grunnar ikkje fekk med seg Magnar Heimset sitt kåseri, kan lese det i wordversjon her. -mheim- |
