Hærverk og tjuveriraid gjennom Hyen natt til søndag 31.10.

Natt til søndag 31. oktober vart det utført omfattande innbrot og tjuveri i Hyen. På den provisoriske parkeringsplassen i sandtaket på Osen i Austredalen vart det gjort innbrot i fire bilar og ein gravemaskin. CD-spelarar med diverse utstyr pluss nokre par dyre solbriller vart fjerna frå bilane. Dessutan vart det gjort innbrot i Mesta sine anleggsbrakker under Brekkefossen og på anlegget Storebru - Knapstad i Eikefjord.

Politiførstebetjent Torbjørn Sælen frå Gloppen lensmannskontor granskar ein av dei ramponerte bilane.

Politietterforsking
Politiførstebetjent Torbjørn Sælen frå Gloppen lensmannskontor var på staden måndag morgon for å skaffe seg oversikt over skadane og etterforske saka. Han fortel at det gjennomgåande er eldre bilmodellar som har vore interessante for tjuvane denne gongen. Nyare køyrety har fått stå i fred. Eit par av bilane stod ulåste, og desse var uskadde bortsett frå CD-spelarane som var fjerna. Ein del CD-ar, ein forsterkar og nokre dyre solbriller var og stolne. Verst gjekk det ut over ein 1983-modell Volvo 240, som i tillegg til ei knust siderute fekk ramponert koffertloket. Tjuvane hadde tydelegvis funne ut at det måtte vere ein forsterkar til stereoanlegget plassert i bagasjerommet. Også ein Passat, ein Audi og ein gammal BMV fekk vitjing av tjuvane.

Ber om tips få publikum
Sælen seier det er svært viktig at hyarane tenkjer seg godt om og seier frå om ting dei har observert i området natt til søndag, og som kan gje politiet viktige spor å gå etter. Vidare er det om å gjere å få så detaljerte opplysningar som råd er om dei gjenstandane som er stolne, slik at eventuelle funn av tjuvgods kan sporast tilbake til dei respektive hendingane. Det er ofte den vegen slike tjuveri kan oppklarast.

Uheldige jenter
Rasmus Gjengedal var ein av dei uheldige bileigarane. Han fortel at hans 1986-modell Audi 80 stod parkert rett bak den før nemnde volvoen. Også han fekk slegen inn ei siderute, og den flunkande nye CD-spelaren var naturlegvis stolen saman med 10 - 12 CD-plater. Døtrene hans, som disponerer bilen, var heime frå Førde i helga. Lommebøkene deira låg i handskerommet, og dei var sjølvsagt vekke med både bankkort og førarkort. Nokre hundrelappar gjekk og med. To fotoapparat, det eine eit nesten nytt digitalkamera, hadde tjuvane og raska med seg. Han reknar med dei har mist verdiar for omlag 10.000 kroner. Ei ufjelg oppleving for familien Gjengedal. - Slikt skulle ikkje gå an, seier han, - ein føler seg heilt hjelpelaus.

Og vi forstår han godt. Dette kunne austredølingane vore sparde for. Dei har så men nok å stri med denne hausten med stengd veg og alt styret med båt og ferjetrafikk på Ommedalsvatnet. Sjølv om sambandet fungerer utruleg godt og effektivt, får vi berre vone at mildveret held seg til tunellen gjennom Lakshammaren står ferdig ved juletider ein gong.

Innbrot i brakkeleirar

I Mesta sine brakkeleirar under Hopsbrekka og på anlegget Storebru - Knapstad har tjuvane brote seg inn og stole sambandsutstyr for 25.000 kroner. Oppsynsmann Steinar Eide seier til avisa at dei, kloke av skade, brukar å ta sambandsradioane med seg heim etter arbeidstid, men i Hyen låg det fire slike radioar i ei brakke. - Ved Storebru - Knapstad har tjuvane berre funne ladarar og batteri, men det er forbanna irriterande likevel.