Vakker 17.mai-feiring i strålande sol i Hyen 2007


Folketoget på veg til Lunden der festprogrammet vart halde midt på dagen i det nydelege vårveret.

Nydeleg vér
Det vart ein nydeleg 17. mai i Hyen i år. Ein var budde på å ha festprogrammet innandørs denne gongen sidan det var meldt nattefrost natta før. Det var litt kaldt og sur vind om morgonen, men det kom seg utover dagen, og det vart bestemt å ha programmet oppe i Lunden der ein aller helst vil vere når véret er bra. Og folk kosa seg under grønt lauv og strålande sol i den idylliske og tradisjonsrike festplassen.


Etter høgtidsgudstenesta i kyrkja, var det som vanleg festpolonese framfor Gymbygget med mange vakre bunadar. Midt på bildet går leiaren i festkomiteen, Bergfrid Rønnekleiv, i hardangerbunad.


Lærar, skodespelar og  forfattar ,sørstreningen Arne Rygg, heldt ei god og litt utradisjonell festtale for dagen.

 


Kona hans, skodespelar Maja Rønneberg Rygg, opna programmet i Lunden med å lese dikt.

 

Program
Programmet for dagen var tradisjonelt med tog til kyrkja tidleg på føremiddagen og polonese framfor Gymbygget før folk samlast i Gymsalen til kjøtkaker, ertestuing, poteter og brun saus. Og sjølvsagt det kulinariske høgdepunktet for mange denne dagen; god gammaldags heimekokt dravle. I Samfunnshuset kunne ein kjøpe kaffi og kaker til dessert, og sjølvsagt is og brus til ungane.

Etterpå var det folketog til Lunden der eit variert festprogram vart servert. Programmet starta med diktlesing. Spelemannslaget var naturlegvis med denne gongen og, det er fast tradisjon i Lunden.

Etter festtalen var det skulekorpset sin tur før grønrussen fekk sleppe til med diktlesing og song.


Den bunadskledde og strame guten er Odd Arne Røyrvik. Han kosar seg med is i finevéret.


Hyen Spelemannslag spela både til polonesen framfor Gymbygget og under festprogrammet i Lunden. 


Grønrussen underheldt med fin diktlesing og song, sjølv om dei sikkert var trøytte etter vakenatta. Komiteleiaren nytta høvet til å gje dei skjenn for å ha gjort "bøvelskap"og påført festkomiteen mykje ekstraarbeid med å rydde opp.

- mheim -

17.mai 2006     17.mai 2005     17.mai 2004     17.mai 2003     17.mai 2002