Det vart ein blåstrig 17. mai i Hyen i år og. Regnbyene og den sure vinden jaga aktivitetane stort sett innandørs. Uteaktivitetane avgrensa seg til folketog til kyrkje på føremiddagen og før festprogrammet i Gymsalen etter middag. Ein del leikar og sportslege aktivitetar på idrettsplassen vart det og høve til mellom byene. Men hyarane slutta som vanleg mannjamnt opp om feiringa av nasjonaldagen, og det såg ut som dei retteleg kosa seg i Gymsalen og Samfunnshuset. Etter pinshelga med 17. mai som den tredje helgedagen på rad, var det mange utflytta hyarar som hadde teke turen heim, og folk fekk skikkeleg høve til å treffast og snakke med gamle kjende.

Ola Tormod Ommedal var komitêleiar og konferansiêr i Gymsalen.

Hyen Skulekorps står naturlegvis sentralt i 17.maifeiringa i bygda. Fredrik her i djup konsentrasjon med kornetten.

Program

Programmet for dagen var tradisjonelt med tog til kyrkja tidleg på føremiddagen, polonese framfor Gymbygget før folk samlast i Gymsalen til karbonadar med løk, ertestuing, poteter og brun saus. Og sjølvsagt det kulinariske høgdepunktet for mange denne dagen; god gammaldags heimekokt dravle. I Samfunnshuset kunne ein kjøpe kaffi og kaker til dessert, og sjølvsagt is og brus til ungane.

Festprogrammet starta med korpsmusikk. Kulturskulerektor Ann Karin Wendelborg Ose hadde prisverdig teke turen til Hyen for å dirigere Hyen skulekorps denne dagen. Jentene i 10.klasse framførte diktlesing og song frå scena. Hyen sin eigen stortingsrepresentant, Per Steinar Osmundnes heldt ein frisk og høveleg lang festtale. Men dei som hadde håpa at den talentfulle unge, framstormande KrF-politikaren skulle makte å lyfte 17.maitalen ut av dei 112 eidsvollsmennene frå 1814 sine noko utslitne fang og fram til meir dagsaktuelle problemstillingar, vart sørgjeleg skuffa. Han unngjekk med elegant omhu å snakke om regjeringspolitikk og dagens samfunnsutvikling. 

Bygda sin eigen stortingsmann, Per Steinar Osmundnes, heldt ein frisk og engasjert tale for dagen.