Det vart ein regntung og blåstrig 17. mai i Hyen i år. Regnet hølja ned som det berre kan i Hyen når sørvestkulingen står på som verst. Uteaktivitetar på tradisjonelt vis var, om ikkje uråd så i alle fall svært lite freistande, så denne gongen vart det stort sett innefeiring. Men hyarane surmula ikkje for det, tvert i mot såg det ut som dei retteleg kosa seg i Gymsalen og Samfunnshuset. I ei veke med to ekstra helgedagar, var det mange utflytta hyarar som hadde teke turen heim, og folk fekk skikkeleg høve til å treffast og snakke med gamle kjende.

Når ein ikkje kan leike ute . . .

Matias Hope var komiteleiar og konferansier i Gymsalen.

Program

Programmet for dagen var tradisjonelt med tog til kyrkja tidleg på føremiddagen. Polonesen før middag vart sløyfa denne gongen, og folk samlast i Gymsalen til karbonadar med løk, ertestuing, poteter og brun saus. I Samfunnshuset kunne ein kjøpe kaffi, te og kaker til dessert, og sjølvsagt is og brus til ungane.

Festprogrammet starta med korpsmusikk og song. Pensjonert stortingsmann, lærar og rektor, Leif Blakset heldt ein god og høveleg lang festtale. Han fortalde m.a. om sterke inntrykk og opplevingar han, som 11 - 16 års gut, hadde hatt under krigen. Han og familien budde i Klokkargarden på Eid på den tid. - Det er viktig at vi få attlevande formidlar opplevingane våre frå krigsåra til dei som veks opp i dag, sa han.

Leif Blakset frå Blakset i Stryn heldt tale for dagen.