Romjulsfesten i Hyen 30.12.2004

Den 30. januar samla Hyen Ungdomslag små og store i bygda til ein god gammaldags bygdafest med mykje godt heimelaga program og matservering i Gymsalen, og med dans i Smfunnshuset til bra musikk av Steinar Engelbrektson Band. Den tragiske og enormt omfattande flodbølgje-katastrofen i Søraust-Asia la naturleg nok ein dempar på festen, og vart markert med eitt minutt stille ettertanke i starten av programmet. Hyen Bondelag hadde teke initiativ til ei spontaninnsamling til offera for katastrofen. Ungdomslaget la 5.000 kroner i bøssa, og oppfordra andre lag og organisasjonar til å gjera det same. Bøssene stod framme heile kvelden slik at også private kunne få høve til å gje.

Opningssketsj med jon Bjarne Hope, Even Rønnekleiv og Ole Arild Aa i rollene.    Alle foto: Magnar Heimset

TV2-parodi
Eitt av dei friskare innslaga var ein heimesnikra sketsj som parodierte TV2-programmet "Vil du bli millionær" der tittelen var fritt omsett til "Vil du bli misjonær". Premiane var eitt års abonnement på Kyrkjebladet, eitt år som vararepresentant i Soknerådet og til slutt å bli misjonær i Austredalen. 

Marlin Aa som overengasjert programleiar og Heidi Mjellem som konkurransedeltakaren som til slutt fekk bli misjonær.

Kåseri
Den faste programposten kåseriet er alltid imøtesett med spenning. Ungdomslaget er flinke til å finne fram til, og få fram på nye dugande talent. Denne gongen var det Torger Eimhjellen, ung bonde og fleirfoldig småbarnsfar på Rongkleiva, som fekk prøve seg. Den jobben greidde han godt, med ektefølt sjølvironi og harsellas over eiga evne til omstilling og tilpasning til nytt levesett.

 
Kåsør Torger Eimhjellen meistra sjølvironiens edle kunst, medan Even Rønnekleiv sin utstuderte immitasjon av lastebileigar Arve Aasen var ein skikkeleg fulltreffar.

Lakshammaren
Eit friskt og aktuelt innslag med lokal karakter, var ein forseggjort sketsj med all ståheien rundt Lakshammaren som rasa ut som tema. Her vart sentrale aktørar i dramaet på og ved Ommedalsvatnet karrikert på ein treffande måte, og til stor åtgaum i salen. Even og Eli Johanne si tolking av ekteparet Aasen og deira utfordringar med å få transportert 7.500 høner forbi rasstaden var særdeles vellukka, og utgjorde nok høgdepunktet i programmet.