Reisebrev frå Jon Bjarne og Synnøve

Her er ei av New Zealands nydelege elvar, kor svære aurar sto tett. Perfekt for flugefiske!

Hyaren Jon Bjarne Hope og dama hans Synnøve Kvile frå Breim var i vinter på ein fantastisk tremånaders tur til New Zealand, Australia og Thailand. Her fortel dei litt av det dei opplevde på den spennande turen sin.

- Den 31. januar 2005 var endelig dagen komen då vi skulle starte på reisa vår ut i verda. Etter månader med planlegging og førebuing, hadde vi bestemt oss for å starte turen heilt på den andre sida av kloden, i New Zealand. Der har vi nemleg ein felles kjenning frå Breim som vi ville besøke. Etter tre døgn (derav rundt 30 timar i rein flygetid) kom vi endeleg fram til Waikapukurau, ein liten landsby søraust på nordøya kor Magnar Støyva bur. Han jobba på ein gigantisk farm kor dei har fleire tusen sauer og kjøtkveg.

I området rundt Rotorua på New Zealand var det mange varme kjelder som gav naturen ei trollsk stemning.

- Det første som slår deg når du kjem til New Zealand er den fantastiske naturen. Der er utrulig frodig og grønt og vakkert! Og så har dei alt i frå isbrear og høge fjell til jungel, sandstrender og geysirar. Eit perfekt land å reise til for dei friluftsinteresserte. Vi fekk med oss både pungrottejakt og fiske i nokre av dei krystallklare elvane kor regnboge- og brunaurar på 2-5 kg sto i tette stimar. Ein annan artig aktivitet vi prøvde var Black Water Rafting. Det gjekk ut på å klatre, hoppe og symje ned gjennom ei underjordisk elv som rann inne i ei grotte i eit fjell.

Operaen i Sydney er ein vakker og spesiell bygning, og er sjølve symbolet på byen.

- Sydney var neste stoppestad. Ein stor men likevel veldig fin by der operahuset er det mest kjente landemerket. Vi fekk med oss operaen ”Toska” då vi var i byen. Eit mellombels Ringenes Herre- museum der enorme mengder våpen, kostymer og figurar frå dei berømte filmane sto utstilt, var òg ei interessant oppleving. Hunter Valley er eit berømt vinproduksjonsområde utanfor Sydney. Dit reiste vi for å sjå korleis produksjon av vin føregjekk, og smakte på ei mengd ulike vintypar.

Krokodilla på biletet er seks meter lang og veg 1260 kg. Mannen på bildet er galen . . .

- Australia har eit veldig rikt dyreliv. I løpet av dei seks vekene vi var i landet, fekk vi sjå veldig mange ulike eksotiske dyr i dyrehagar og ute i naturen. I dyrehagen til Steve Irwin, ”The Crocodilehunter” hadde dei giftige slangar, svære krokodiller, emuar, skilpadder, papegøyer og ei vøle andre dyr som ein ikkje akkurat støyter på i Noreg. Vi fekk òg klappe kenguruar og koalabjørnar og halde ein svær pytonslange kring halsen. I Warrumbungles Nasjonalpark kor vi gjekk fjelltur, kunne det plutseleg sprette ville kenguruar forbi råsa vi gjekk. Og at ein 2,5 m lang varan dukka opp på 10-15 m hald var òg ganske spesielt. Mange er redde for giftige slangar og edderkoppar i Australia. Rett nok såg vi mange svære edderkoppar og ein giftig pytonslange ute i villmarka, men vi var aldri i fare for å bli bitne. Vi var innom ein kvegfarm og fekk lære litt om korleis kjøtfeoppdrett og cowboyliv føregjekk der til lands. Den hadde eit areal på størrelse med Belgia, og hadde fleire tusen kveg. Vi lærte òg å bruke pisk og kaste boomerang. Ein ridetur ut i den australske villmarka var og ei flott oppleving.

White Haven Beach er rangert som den 6.vakraste stranda i verda.

- Byron Bay blei fort ein av våre favorittstader på turen. Den idylliske småbyen hadde flotte strender kor vi kosa oss i sola, lærte oss å surfe og tok dykkarkurs. Den kanskje beste opplevinga vi hadde på turen var ein tredagarstur på ein 61 fots seglbåt. Tre dagar med sol og skyfri himmel kor vi dykka og snorkla i The Great Barrier Reef, overnatta på dekk under ein heilt utrulig klår stjernehimmel, fekk servert nydelege måltid, opplevde fantastiske knallraude solnedgangar, besøkte ei strand kåra til den sjette vakraste sandstranda i verda og elles låg på båtdekket i sola og kosa oss med musikk og kalde øl. Kort sagt ekte livsnyting!

Elefantriding var ein spennande men noko ukomfortabel erfaring.

- I Thailand var vi først til storbyane Bangkok og Chiang Mai. Dei var verkelege mekka for shopping. På digre handlesenter og på marknader i gatene kunne ein få kjøpt alt mellom himmel og jord til ein veldig billeg penge. I jungelen utanfor Chiang Mai var vi på tredagars tur kor vi overnatta hos lokale stammar som levde enkle liv med risdyrking og husdyrhald slik dei hadde gjort i generasjonar. På turen fekk vi prøve elefantriding og bambusflåte-rafting, slik innbyggarane der i området framleis brukar som transportmetodar.

Eit tempel i Thailand fullstendig dekt av gull.

- Av andre opplevingar vi fekk med oss var thaiboksing og ein særdeles behageleg thaimassasje. Nokre svære gulldekte tempel besøkte vi, og fekk sjå korleis dei buddhistiske munkane levde liva sine. Seinare drog vi til Patong på Phuket, kor tsunamien råka i jula 2004. Det aller meste av butikkane og hotella var bygt opp igjen og i drift, så med unntak av nokre få ruinar var det ikkje mykje som viste igjen av øydeleggingane etter flodbølgja. Den siste tida av turen gjekk stort sett med til å slappe av på dei flotte sandstrendene på Phuket og deretter i hengekøyer ved ein bungalow med fantastisk utsikt over havet på øya Koh Pha Ngan.

Dei knallraude solnedgangane i Thailand var endå vakrare enn biletet viser!

- Ei av dei beste sidene ved å ta ein slik langvarig tur ut i den store verda, er alle dei spanande personane ein blir kjende med undervegs frå alle kantar av verda, og gjennom dei lære om deira heimlands kultur, skikkar og levesett. Vi tykte òg det var grådig kjekt å ha nok tid til å kunne utforske og bli godt kjende med somme av stadane vi besøkte. Og kjensla av å styre tida si fullstendig utan stress eller andøg på nokon verdens ting er verkeleg herleg. So alt i alt hadde vi ein uforgløymeleg tur med flust av artige opplevingar og gode minner.

Jon Bjarne og Synnøve