Heidra av Livredningsselskapet

Øystein Aa frå Hyen vart sist søndag tildelt redningsdådsdiplom med tilhøyrande blomster og gåve få Norges Livredningsselskap for at han berga ein tyske trailersjåfør frå å drukne etter ei dramatisk utforkøyring før jul.

– Eit diplom for redningsdåd heng svært høgt, men er absolutt på sin plass. Øystein Aa risikerte sitt eige liv og berga ein mann og ein far, sa Hans Terwindt mellom anna under overrekkinga i Slåtthaughallen på Nesttun i Bergen sist søndag. Foto: Karen Anita Aa

Det var om kvelden den  13. desember i fjor at Reinhard Bernhard Seggewiss, busett på Sande i sunnfjord, miste kontrollen over traileren han køyrde på glatta i Romarheimsdalen. Han brasa gjennom autovernet og for gjennom isen i Nipetjørna. Øystein Aa, som var på veg til Bergen etter ein helgetur heime i Hyen, kom til like etter ulukka. Han såg tydelege skrensespor i vegen og at autovernet var brote ned eit stykke. Han bremsa opp så fort han kunne, rygga tilbake og hoppa ut av bilen. Då høyrde han rop om hjelp frå vatnet like nedanfor vegen.

Kritisk
Frå då av gjekk alt på instinkt for Øystein, og adrenalinet kokte i årane hans. Det var bekmørkt, men lysa på trekkvogna stod på og lyste under vatn, så han skimta at sjåføren hadde kome seg opp på bilvraket og til overflata. Øystein skubba vekk nokre isflak og fekk sjåføren til å hoppe mot seg. Då gjekk han under fleire gonger, og han greidde ikkje å symje skikkeleg. Det var krise, og Øystein laut hoppe ut i vatnet sjølv og vasse ut til marbakken. Ståande til opp under armane i isvatnet, nådde han så vidt tak i handa til sjåføren og fekk drege han inn til lands. Der fekk han hjelp av ein tilkomen bilist som kasta ned ei lastestropp, og saman fekk dei drege den sterkt medtekne sjåføren opp på vegen og inn i ein varm buss som då var komen til.

Sterkt møte
Trailersjåføren og familien hans var til stades under overrekkingsseremonien i Slåtthaughallen på Nesttun i Bergen, og det vart eit sterkt møte mellom dei og redningsmannen. Familien gav uttrykk for at dei var svært takksame for Øystein sin store innsats og at han alltid ville vere den store helten deira.

  – Eg hadde ikkje møtt dei før etter hendinga, og det var litt spesielt å sjå att sjåføren. Det var kjekt å bli kjend med han, og eg fekk inntrykk av at han er ein veldig grei kar. Det var òg høgtidleg å få overrekt diplom og blomster av Elin Gullaksen og Hans Terwindt i Livredningsselskapet. Dei orienterte om arbeidet i selskapet og las opp grunngjevinga for diplomet. Ordføraren i Bergen, Gunnar Bakke, var der òg med kjede og greier og heldt tale. Jau, det var stor stas, fortel Øystein, som gjerne vil treffe familien Seggewiss att ved seinare høve.

Reinhard Bernhard Seggewiss og familien hans gav uttrykk for at dei er svært glade og takksame for innsatsen Øystein Aa gjorde då han berga familiefaren opp av isvatnet den skjebnesvangre, mørke desemberkvelden i fjor.

Øystein Aa berga tysk trailersjåfør. Les Firda Tidend