Dagleg leiar i Brødrene Aa AS, Tor Øyvin Aa, og Marknadssjef i Devold AMT, Baard Røsvik, med statuetten dei fekk som vinnarar av JEC Awards i kategorien Marine på materialmessa i Paris 05.04.05.
Her er dei fotografert på Devold AMT sin stand på messa.     Foto: Asle Isaksen

Brødrene Aa og Devold AMT var nominert til "JEC Awards" i kategorien Marine for samarbeidet rundt nye sandwichskrog i karbonfiber og vinylester. Då juryen 05. april i år, på opningsdagen for JEC, delte ut prisen til dei norske selskapa, var det ikkje fritt for at champagnen fløymde blant glade nordmenn i Paris.

Stor stas
Det var kl. 17.00 på opningsdagen for JEC i Paris, nærmare bestemt i Grand Auditorium i Parc des Expositions prisutdelinga gjekk føre seg. Det var fleire nordmenn frammøtte for å overvære utdelinga, men det øydela nok litt av spenninga at JEC si heimeside hadde offentleggjort vinnarane på internett fleire veker før. Det hindra likevel ikkje at champagnen fløymde blant nordmennene då professor og fysikar Michio Kaku delte ut prisen.

Krevjande kundar
Både Tor Øyvin Aa og Baard Røsvik legg vekt på at krevjande kundar har vore pådrivarar til begge selskapa si utvikling. Når denne prisen vart tildelt dei nye båtane, er det eit resultat av lang tids arbeid og stor kompetanseoppbygging hos mange. Tor Øyvin Aa nemner spesielt samarbeidet med ABB Offshore og utviklinga av frontar/plogar til flytoga på Gardermobana og Signatur-toga som viktig for utviklinga av vakuminjiseringa.

– Dette materialet har vore nytta tidlegare i t.d. flyindustrien og til romfart der pris gjerne ikkje er det viktigaste kriterium. Vi har teke materialet i bruk i større strukturar i kommersiell samanheng, og har utvikla det til bli konkurransedyktig også på pris, Seier Aa.

Samarbeid
Samarbeidet om utviklinga starta i 2001 med bygging av ein prototype. Så starta "eventyret" med levering av ambulansebåtar og større katamaranar for passasjertrafikk til reiarlaget L. Rødne & Sønner AS i Stavanger som gav det kommersielle gjennombrotet i fjor haust. Etter den tid har Br. Aa fått fullt opp å gjere med produksjon av liknande båtar for andre reiarlag. Det vert no snakka om å utvikle enda større katamaranar som skal kunne ta 350 passasjerar eller meir.

Lettare men dyrare
Vi har før skrive om kor stor vektreduksjon ein kan oppnå med å bruke karbonfiber i staden for glasfiber i båtane.

– Vektreduksjonen og lågare drivstoffbruk er enda viktigare for dei større båtane enn for dei som er levert før. Kombinasjonen karbonfiber og bruk av vakuminjisering reduserer strukturvekta med om lag 40%, noko som igjen reduserer drivstoffbruken kraftig, seier Tor Øyvin Aa til avisa.

– Prisen på karbonfiber er høgare enn på glasfiber, men differansen har gått nedover siste åra. Når ein så tek omsyn til at styrken er vesentleg høgare slik at ein kan dimensjonere deretter, og at det trengs mindre motorkraft for å oppnå den farten ein ønskjer, er prisauken likevel berre om lag 10%, opplyser han.

Prestisjetung pris
– Kor høgt heng denne prisen, og kva tyder det å få ein slik pris? Vi stiller spørsmålet til sjefsredaktør Asle Isaksen i tidsskriftet "Plastforum". Han har god oversikt over bransjen, og var til stades på messa i Paris.

– Du kan godt kalle prisen for produsentane av plastmaterialar sin Oscar, så dette blir det blest om. Prisen heng høgt og er omfatta av stor interesse frå næringslivsfolk frå heile verda, seier Isaksen. Han er nett komen heim frå Paris, og er dyktig imponert over både Br. Aa som produserer båtane, og samarbeidspartnaren Devold AMT som leverer karbonarmeringa.

God marknadsføring
– Det har vore fleire med på å utvikle produktet enn desse to, som designerar og liknande, men det er Br. Aa som produserer båtane, og dette har dei fortent. Dei er flinke og vågar å satse, og det må ein i dagens knallharde konkurranse. Det nyttar ikkje å sitje og vente på at kundane skal kome til oss. Vi må ut i verda og snakke med dei rette folka på dei rette arenaer. Denne messa i Paris er ein slik arena. Der kjem det ulike produsentar frå heile veda for å sjå på det siste nye i materialutvikling, seier Isaksen.

– Så desse superlette båtane i karbonfiber vert skikkeleg lagt merke til, meir enn alt Br. Aa har gjort før. Dei har alt knytt kontaktar og registrert interesse frå heile verda. Dette med høgteknologi er viktig i eit høgkostland som vårt, og eg trur samarbeid mellom ulike aktørar i marknaden kan vere nøkkelen til suksess, hevdar Isaksen.

Marknadssjef i Devold AMT, Baard Røsvik, og dagleg leiar i Brødrene Aa AS, Tor Øyvin Aa, var stolte representantar for vinnarane av JEC Awards i kategorien Marine på materialmessa i Paris 05.04.05.
Foto: Asle Isaksen