Pensjonisttreff i Hyen

Laurdag 04. september 2004 inviterte Hyen Pensjonistlag glppenpensjonistane til fellesmøte i Gymsalen i Hyen. Det var påmeldt 120 deltakarar, og då leiaren Olav Røyrvik ynskte velkomen, var salen bortimot fullsett. Dette årlege treffet har etterkvart vorte ein tradisjon, og dei ulike lokallaga i kommunen vekslar på å stelle i stand til fellesmøtet.


Gymsalen i Hyen var bortimot fullsett med 120 frammøtte pensjonistar frå heile kommunen.

Martin Ø. Ommedal heldt "Ord for dagen". Han kunne ikkje unngå å kome inn på dei grusomme hendingane i Beslan, og stilte spørsmål om kvifor vi går klar her hos oss. Som eit apropo las han diktet "Kven skal eg takke". Han las og sjølvskrivne dikt; om tur til støylen etter at støylssommaren var slutt, som han kalla "Ein gamal gangsti", og "Tunbjørka heime fortel i november".


Leiaren i Hyen Pensjonistlag, Olav Røyrvik, meinte han ynskte velkomen til fellesmøte i Hyen for tredje gong.


Martin Ø. Ommedal tok seg av opningsinnslaget med ord for dagen, og las m.a sjølvskrive dikt "Ein gamal gangsti"

Maten kom tidleg på bordet denne gongen, særleg med tanke på dei som hadde reist lengst og kanskje var svoltne. Det vart diska opp med nydeleg rømegraut og spekemat med rikeleg av alt som høyrer til. Og grauten vart spela inn etter gamal skikk med Hyen Spelemannslag i spissen. Dei spela og "taffelmusikk" mellom grauten og kaffien med melodiar som parisaren "Fjordingen" og tangoen "Møllerens Iren". Vi såg tydeleg at det rykka i dansefotar langs bordrekkjene. . .


Hyen Spelemannslag spela inn grauten. Etter dei kom kokkane Anne Marie Eimhjellen og Aslaug Sæterlid, og til slutt ei lang rad med skålberande pensjonistar med store mengder glinsande feit rømegraut. Alle vart mette. . .


Mange var mette, men ingen sovna når Sverre Folkestad kåserte.

Så var turen komen til Sverre Folkestad med lokalhistorisk kåseri. Han tok utgangspunkt i presten Gabriel Heiberg sine livaktige, underfundige og tildels ukorrekte skildrinar av kommunen forma som svar på ei lang rekkje skjemaspørsmål i 1743. Svara var sædeles detaljerte og utfyllande, og omfatta alt frå geografi og dyreliv til jord- og hagebruk og innvånarane sitt lynne. Sverre drog interessante parallellar fram til vår tids aktuelle problemstillingar, og begeistra publikum med mange artige poeng og god framføring.

Einar Solhaug prova til fulle at også pensjonistar kan lære dikt utanboks. Han deklamerte det lange diktet "Mitt følge" av Bjørnstjerne Bjørnson utan å blunke. På spørsmål om kva han ville gjort om han hadde stått fast utan manus, svara han at den problemstillinga hadde aldri vore aktuell. . .


Olin Sande Holme


Ragni Solheim


Heidi Mjellem


Britt Kristin Mjellem


Lars Holme

 Vi har sagt det før, og gjentek det gjerne; det gror godt i Hyen Spelemannslag. Denne gongen har vi tillate oss å presentere ein serie nærbilete av unge talentfulle felespelarar. Diverre var ikkje alle til stades ved denne tilstellinga. Det er grunn til å gje honnør til "gubbane" i laget som tek seg tid til- og brukar krefter på å lære opp ungdomar i denne edle kunsten som dei gler så mange av oss med ved ulike høve.

- mheim -