| Odd-Bjørn Hjelmeset såg ut til å ha ein god dag på
jobben i klassisk NM sprint i Meråker i dag, fredag 19. januar
2007. Han gjekk inn til ein overtydande fjerdeplass i prologen, og
tok seg lett og tilsynelatande kontrollert vidare gjennom kvart- og
semifinalane.
I finalen gjekk det tydelegvis tyngre, og han fekk slite for å
skaffe seg luke i dei to "Odd-Bjørn spesial
diagonalmotene" i den harde sprintløypa. Særleg var Olav
Vigen Hattestad ei seig nøtt å knekkje.
På oppløpet verka det likevel som Odd-Bjørn hadde rimeleg god
kontroll. Men denne gongen var det haudet som svikta. Han starta
gullfeiringa nokre meter før målstreken, akkurat nok til at
konkurrenten, Olav Vigen Hattestad, fekk strekt stortåa såvidt
framom.
Kva var det ho sa, kjerringa, ho blødde naseblod: Er det ikkje
det eine, så er det det andre. . . |
Denne gongen var det hovudet som svikta då
Odd-Bjørn Hjelmeset rota vekk ein sikker gullmedalje på
målstreken i klassisk sprint i NM i Meråker. (Arkivfoto)
|
