Skyttarlaget byggjer for framtida

Med det nye skyttarhuset der alt er under same tak, håpar vi å få eit anlegg som vil vere moderne i mange år framover.

Nytt anlegg

Heilt sidan telen gjekk tidleg i vår, har det vore  stor dugnadsaktivitet på Åbakkane. Vi i skyttarlaget har i godt og vel eit år jobba med å rehabilitere skytebaneanlegget. Tida hadde gått litt ifrå det anlegget vi hadde ståande, og det var berre så vidt egneleg til å arrangere banestemne der. Vi stod overfor eit val om anten å ruste opp 100m-standplassen slik at vi hadde ei bane til trening og lagskytingar, eller å rehabilitere heile bana til eit moderne anlegg med 100m- og 200m-baner som kan stette krava frå såvel skyttarar som publikum. Det er klart at det å byggje opp eit nytt anlegg frå grunnen av er ei stor utfordring for eit lite lag. Men på same tid er vi eit aktivt lag som ynskjer å vere på skyttarkartet i framtida og.

Rehabiliteringa er delt i to prosjekt. Det eine går på skyttarhuset med standplassane og kafe/kontordelen som skal stå ferdig i år. Og det andre går på elektronikken, med elektroniske skiver og anvisningssystem både på 100m og 200m som skal vere klart i 2004.

I det nye anlegget vil det vere plass til 10 skyttarar både på 100m- og 200m- standplassane. Og med el.skiver til alle seier det seg sjølv at det er eit kostbart prosjekt. Den totale kostnadsramma er på 3,6 millionar kroner fordelt med 1,9 mill. på skyttarhuset og 1,7 mill. på elektronikkdelen. Vi har fått tilsagn om kroner 550.000,- i støtte frå fylkeskommunen til kvart av prosjekta. Og for at det skal gå i hop økonomisk må alt arbeid gjerast på dugnad.

Støyisoleringa har vore viktig sidan vi har valt å ha både standplass og kafe/kontordelen under same tak. Men vi har tru på at det å ha garderobe og kafe med resultatvisning på storskjerm so og seie vegg i vegg med standplass, skal gje oss eit kompakt og effektivt skyteanlegg.

Skytesesongen 2003

Hyen stilte med 12 deltakarar på Landsskyttarstemnet på Oppdal. Det var ei fin veke med god stemning og alle kom seg vel heim før stor u-veret slo til i Trøndelag. Beste resultat sto Ole Arild Aa for med 25.plass på baneskyting (342p og best frå Sogn og Fjordane) og 55.plass på NM grovfelt.

I Norges Cupen har vi fått fleire gode plasseringar i år. Nils Holme skaut 346p og fekk 3.plass under eit NC-stemne i Sunndal. Bertel Odne Mjellem hadde ei storhelg på Austlandet der han fekk ein 3., ein 5. og ein 10.plass på dei tre siste stemna i Norges Cupen. Det beste resultatet oppnådde han i Tingelstad med heile 348p. Og her var begge niarane 9,9. Vi vann fylkescupen i lagskyting med 1360p som er 340p i snitt. Peder Holme vann sin klasse på Olsokstemnet i Markane med 394p som er solid rekord på dette stemnet.

På fredagskveldane er vi no komne godt i gong med treninga til neste sesong. Det blir mykje skyteprat om resultat, teknikk, skytestillingar, ambisjonar og eindel om jakt. Alt i midten av januar startar den nye sesongen. Då går det i innandørsstemne mest kvar helg til ut februar. Men før den tid er det jul.

  Hyen skyttarlag vil takke alle som har hjelpt til og gjort ein god innsats på skytebana i år, og ynskjer alle god jul og godt nytt år.

Tekst: Ole Arild Aa

Magne Osmundnes som styrer økonomien for prosjektet, stiller og opp med dugnad på bygget. I bakgrunnen: Geir Kjetil Aa, Peder og Terje Holme.