Badestranda like ved villmarksleiren ved Storevatnet.

Hyen Natur og Friluft ynskjer å legge til rette for spennande naturopplevingar frå fjord til fjell i den vakre bygda vår. Vi ynskjer at du skal kome til Hyen for å oppleve den ville og vakre naturen her.

Og det er mange her i Hyen som har noko spennande å by på. Det kan vere gamle sel til leige, båtar, kunnskap om bygda, gode historier, tradisjonsrik kokkekunst og, ikkje minst, god kjennskap til fjell og fjord.

Vi har mange spennande turar å by på. På Byrkjeneset ved Storevatnet i Gjengedalsmarka har vi ein godt utstyrt “Villmarksleir” (biletet t.h.) der folk kan få seg mat, hyggje seg og overnatte. Her kan enkeltpersonar, skular og grupper ta turen innom og få leige båt, kano, fiskeutstyr m.m. Leiren er eit godt utgangspunkt for turar i området, eller som fiskecamp der vatnet like ved kan by på fine fiskeopplevingar.

Gjegnen (1670 moh.) ragar høgt og fritt over Gjegnalundsbreen.

Sjølvsagt skal dei mektige fjella også visast fram. Med kjentfolk vil ein få den tryggaste vegvisaren med seg. Det er bratt og spennande å ta seg opp  fjellsidene, og utsikta som ventar ein på toppen er heilt fantastisk.

Det knyter seg mange soger og segn til enkelte stader i fjellområda her, og desse vil guidane fortelje under vegs.

Det er også høve å ta i bruk fjorden. Med ein tur i båt kan turistane få sjå vår unike flora og fauna. Her er mykje flott plantevekst og slyngplantar. Er ein heldig, kan ein få oppleve å sjå sel og hjort på land. Det er også høve å gå i land undervegs for å plukke bær, bade eller tilberede nyfanga fisk.

Sommarkveld på Hyefjorden.