|
Ljøren på lufta nok ein gongSå er Ljøren, sogeskrift for Gloppen Sogelag, i handelen.
Som før om åra er stoffutvalet variert. Tidsspennet er stort. Vi får høyre
om steinskred frå fjellet Vora i Breim for fleire tusen år sidan. Det er med
skildringar frå glopparar og breimingar som utvandra til Amerika rundt førre
århundreskiftet, og i artikkelen 70 år med post, varer og tenester, får
vi høyre om Metteneskarane som i sju tiår frakta både folk, post og varer til
gardane på vestsida av Hyefjorden. Av nyare stoff kan nemnast ein
fotoreportasje frå september 2006 då kronprins Haakon og kronprinsesse Mette-Marit vitja Gloppen, og ein godt
illustrert artikkel om den nye ordførarkjeda. Meteorittmetropolen GloppenOgså i år er det fleire artiklar med stoff frå Hyen.
Magnar Heimset er fast medlem i redaksjonen i Ljøren. I år har han skrive ein
interessant og informativ artikkel om meteorittar i Gloppen. Av 14 meteorittfunn
i heile Noreg, er to gjort i Gloppen. Ein av dei, Mjelleimmeteoritten, fall ned
på Mjellem 24. januar 1898. Ola Mjellem, som var 16 år, og den yngre broren
Jakob heldt på å køyre ved frå Mjellemslia då noko kom susande gjennom
lufta, trefte ei bjørk og fall ned i snøen. Gutane gav seg til å grave og
fann ein liten stein. Steinen var framleis lunka då dei grov han opp. Vi får
og høyre om den andre meteoritten frå Gloppen, Svartekarimeteoritten. Eit lokalt diktarjubileum: Sigurd Rønnekleiv 100 årOve Eide, som nyss har gjeve ut bok om Jakob Sande,
presenterer forfattaren Sigurd Rønnekleiv. Sigurd var ein gåverik ungdom som
var i gang med lærarutdanning i Volda då han vart sjuk av tuberkulose. Han døde
berre 26 år gammal i 1932. Året etter at han døde kom det ut ei bok, Haust
i vår, med 52 tekstar, både dikt, prosatekstar og småstubbar. Sigurd Rønnekleiv
var ein talentfull forfattar. ”Haust i vår er ei rik samling i seg sjølv,
men det er uråd å lese den utan å tenkje på kva denne lovande forfattaren
kunne ha utvikla seg til”, skriv Ove Eide som i tillegg til omtale av
forfattaren har med nokre av dikta hans i artikkelen. Krig i Norge – fredelig på RongkleivenI artikkelen med denne overskrifta fortel Ingri Linde
levande om korleis ho som ungjente opplevde å kome frå sterkt krigsråka
Bergen til fredelege Rongkleiva under krigen. Første sommaren ho kom dit var i
1942 då ho følgde Jakob og Astrid Rønnekleiv heim att etter at dei hadde vore
ein tur i Bergen. Sidan var ho på Rongkleiva kvar sommar til og med 1945. I
artikkelen fortel ho litt om kontrastane ho opplevde mellom Bergen og Hyen, og
om korleis ho tok del i dagleglivet og vart glad både i folket og bygda i løpet
av desse åra. ”Vi har været svært indespærret
nesten i hele vinter”.
Kvart år har Ljøren ei samling notisar frå avisa
Nordfjord. I samlinga i år, Stort og smått i året 1906, er det fleire
innsmett frå Hyen. Vi kan mellom anna lese om at det vart oppretta postopneri både
i Heimseta og Eimhjella dette året. I eit lengre lesarinnlegg skriv ”Vestredøling”
om korleis folk i Vestredalen har hatt store vanskar på grunn av mykje snø og
ruskevêr vinteren 1906. Til slutt i lesarinnlegget gjer han seg og sine tankar
om skattelikninga for Gloppen som sannsynlegvis har vore kunngjort i avisa
tidlegare. Korleis få tak i Ljøren?
Ljøren er til sals i butikkar i Hyen, på Sandane og i
Breim og kostar 100 kroner i utsal. For utanbygds kan han dessutan bestillast
ved å kontakte kasserar i sogelaget, Margret Sande, på tlf. 57 86 78 50 eller
på epost margret.sande@enivest.net
(porto kjem då i tillegg til prisen). Sverre Folkestad |
