Ljøren 2005 med mykje spennande stoff frå Hyen

Ljøren årgang 7, sogeskrift for Gloppen, er i handelen. Redaksjonen legg vekt på at stoffet skal vere variert. Bladet er svært rikt illustrert, og som vanleg er det med stoff frå heile kommunen. Magnar Heimset er fast medlem av redaksjonen og har også i år funne fram mykje interessant stoff frå Hyen.

Yrkessjåførpioneren Alvhild Aa

Magnar har intervjua Alvhild Aa som berre 20 år gammal, i 1936, vart fast tilsett som sjåfør i Hyen Billag. Ho var truleg den første kvinnelege sjåføren tilsett i eit rutebilselskap her i landet. I det spennande og levande intervjuet får vi vere med på litt av kvart. Alvhild køyrde kvalkjøt til revegardane i Gjengdalen. Ho køyrde revar på utstilling, køyrde stein med lastebil på Hopsvatnet til brukara for den nye brua over Straumselva. Ho brøytte vegar i Vestredalen og dreiv med persontransport. I intervjuet blir vi kjende med ei uredd og modig ung kvinne som ikkje gjekk av vegen for tøffe utfordringar. Intervjuet gjev, gjennom fleire interessante små glimt, eit svært godt tidsbilete av farne år. 

Anders Nielsen Home – mannen som felte 90 bjørnar

I den andre artikkelen til Magnar får vi høyre om Anders Nielsen Holme, fødd 1799, på Holme. Det seiest at han skaut over 90 bjørnar medrekna dei han tok i sjølvskot. Hovudkjelda til denne artikkelen er Ola J. Mjellem, far til nolevande Jakob Mjellem. Gjennom Ola Mjellem sine ord får vi høyre om mange spennande og nervepirrande episodar som Anders var ute for som bjørnejeger, mellom anna om då han i nærkamp med bjørnen først fekk trykt av etter at bjørnen hadde bite over løpet på munnladningsrifla. Den handskrivne søknaden der Anders Nielsen Holme i 1847 søkte ”Det Nyttige Selskab” i Bergen om premi for alle bjørnane han hadde felt, er og med, i seg sjølv ein skikkeleg godbit.

Då me fek konge – dikt frå januar 1906

Ljøren har fått låne ”Forglemmigei”, handskrive blad for Strømme (Straume) Ungdomslag. Der er eit fornøyeleg dikt skrive i januar 1906. Vi veit ikkje kven som har ført diktet i pennen, men etter tonen å dømme, var nok forfattaren ein av dei 283 (32,2%) i Gloppen som i november hadde stemt nei til kongedømme. Diktet er nokså ironisk Vi saksar eit par vers.

Tilladelsen til at skyde hundyr tør vise seg meget skadelig

I små utdrag  frå 1905-årgangen av avisa Nordfjord, er hjortejakt tema fleire gonger. I jagttiden i 1904 blev der i Hyen skudt i alt 16 hjorte, får vi vite. Redaktøren er elles bekymra for at folk skyt hodyr, og at det må vere årsaka til at talet felte hjort har gått sånn ned. 

I det heile burde det vere noko for ein kvar smak i Ljøren 2005. Her er stoff frå dei fleste bygdelag i kommunen. Her er lange og korte artiklar, underhaldning i form av reiseskildringar, mellom anna ein tur til Paris med veteranbil i 60-åra og meir historisk fagstoff som artikkelen om Gloppen i 1905 og mykje flott biletstoff.

Korleis få tak i Ljøren

Ljøren er til sals i butikkar i Hyen, på Sandane og i Breim og kostar 100 kroner i utsal. For utanbygds kan han dessutan bestillast ved å kontakte kasserar i sogelaget, Margret Sande, på tlf. 57 86 78 50.
Kr. 22,- i porto kjem då i tillegg.

Sverre Folkestad

- leiar i Gloppen Sogelag -