Kvelvingsbruna

Kvelvigsbruna i Hopsdalen på riksveg 615 mellom Straume og Heimseta er eit vakkert stykkje ingeniørkunst. Ho vart bygd i 1934 som bruløysing over Hopselva nokre hundre meter nord for Hopsstøylen som då offisielt heitte Breistøl på kartet.


Kvelvingsbruna sett ovanfrå mot Hope. Ho er eit vakkert byggverk som fell godt inn i naturen.

Byggjemåte

Brua vart bygd i ei tid då ein stort sett hadde teke til å nytte stål og betong til slike prosjekt, og gått bort frå dei reine steinbruene som handtverksmessig nok var svært tidkrevjande å byggje.
Det interessante ved denne brua, er at her er nytta ei kombinasjonsløysing der det berande elementet er to yttervangar laga av nøye tilhoggen stein med mørtelfuger mellom, og betongblanding ilagt prosentstein med paralelle sider vinkelrett på trykklinja mellom vangane. Det heile er lagt på ein godt fundamentert murfot i kvar ende og bogeforma treforskaling imellom. Når brua så var ferdig og betongen herda, vart forskalinga fjerna, og det bogeforma berande elementet som då kom i press mellom murføtene heldt brua oppe.
Sjølve bruspennet er 14,5 m langt, og brua er 5,0 m brei. Kostnadsoverslag datert 12. Januar 1934 var på kr. 11.000,-.


Austenden på brua sett nedanfrå. Her er det fundamentert rett på fjellet. Legg merke til kor nøye steinane er tilhogne og samanføya. Kombinasjonen betong ilagt prosentstein i midten er interessant.

Veganlegget

Det 13.720 m lange veganlegget mellom Straume og Heimseta var eit forholdsvis stort anlegg med fleire store og mange mindre bruer. Alle dei andre bruene er bygde i betong. Dei store med berebjelkar av stål. Det tok naturlegvis lang tid å planlegge og å få realisert dette anlegget.

Første kostnadsoverslaget skriv seg frå 1889 og lydde på kr. 34.400,-. Ved utarbeiding av vegplanen i 1917 var det kome opp i kr. 120.000,-, og seinare same år kr. 250.000,-.
Ved handsaminga av vegplanen i 1921 var summen komen opp i kr. 1.000.000,-.
Mønsteret er lett attkjennande frå offentleg forvaltning også i nyare tid.
Vegen vart avlevert 29. september 1936, og lengda var då oppgjeven til 14.046 m.


Grov kartskisse over veganleggsområdet. Kvelvingsbruna er lokalisert i sirkelen
midt på. Kartet som skissa er eit utsnitt av, er datert januar 1923 og signert O. H.

Tekst og bilete: Magnar Heimset, 2002.

Kjelde: Statens vegvesen Sogn og Fjordane v/Per Birger Lomheim.