Stor interesse for kraftmøte i Hyen


Opp mot 50 kraftinteresserte følgde nøye med då nettkapasiteten i høve til aktuelle  utbyggingsprosjekt vart utgreia.

Omlag 50 interesserte personar møtte fram på folkemøte om småkraftutbygging, nettkapasitet og grøne sertifikat i Samfunnshuset i Hyen måndag 07. november 2005.
 - Full utbygging sprengjer kraftnettet på alle nettnivå, sa direktøren i SFE Nett, Asgeir Aase i si utgreiing.

Det var stort frammøte av interesserte kraftutbyggjarar då det vart halde ope orienterings- og diskusjonsmøte om utbygging av småkraftverk, linjekapasitet og grøne sertifikat i Samfunnshuset i Hyen måndag 07. november 2005. Både netteigar SFE Nett og Gloppen Kommune var representert i møtet.

Sprengjer nettet
 - Dersom alle mogelege utbyggingsprosjekt vert realisert, vert kraftnettet sprengt på alle nivå, både lokalt, regionalt og i det overordna linjenettet, sa nettdirektør Asgeir Aase i SFE Nett.


Nettdirektør Asgeir Aase i SFE Nett vil ha tett dialog og samordna realisering av kraftpotensialet i Hyen-området.

 - Lokalt og regionalt er det allereie naudsynt med oppgradering av trafoar og linjer, og det er dei nye som skal på nettet med kraft som skal betale kostnadane med opprustning. Her er det "først til mølla" som gjeld, sa talaren.

 - Trafoen ved Sagefossen er allereie for liten, og er under utskiftning. Kostnaden vert omlag kr. 200.000 pr. MW for nye nettbrukarar.

 - Den neste flaskehalsen vert 22kV-nettet frå lokalområdet til Sagefossen. I tredje omgang vert kapasiteten i 66kV-linja ut frå Sgefossen for liten, og i siste instans vil det bli eit spørsmål om sentralnettet har stor nok kapasitet.

 - For dei nettbrukarane som fordrar utbygging av linjene vil kostnaden  bli omlag 1 mill. kroner pr. MW. Ei ny 132kV-linje frå ein sentral stasjon i Hyen til Storebru vil koste 40-50 mill. kroner, og det vil ta tre til fire år å få ho bygt, opplyste Aase.

Politikarane må på bana
Fleire av dei frammøtte hadde spørsmål og synspunkt på saka. Det var stor semje om at NVE sitt regelverk ikkje høver for den situasjonen ein er oppe i no, og at det er på høg tid at politikarane kjem på bana og ordnar opp i eit regelverk som til dei grader sler uheldig ut, og som fører til heilt urimelege og urettferdige kostnader for dei som "sprengjer" nettet. Mange aktuelle prosjekt vil bli effektivt stoppa av tunge nettkostnader slik reglane for nettilkopling er no.

Det vart og understreka kor viktig det er å finne løysingar for opprusting av linjenettet, for NVE krev m.a. at nettkapasiteten er på plass før dei ulike prosjekta vert konsesjonshandsama. Frå kommunen si side vart det gjeve uttrykk for at ein ville vere med og samordne kreftene og å øve påtrykk innover mot sentrale myndigheiter for å få eit regelverk betre tilpassa dagens tilhøve.


Nettdirektør Asgeir Aase i SFE-Nett la på eit lysark som viste kva flaskehalsar i kraftnettet ein har å gjere med i Hyen.


Initiativtakaren til møtet, Kurt Djupvik, hadde laga ei oversikt over aktuelle utbyggingsprosjekt i Hyen.
Eksisterande kraftlinjer har berre kapasitet til å ta unna produksjonen frå dei fem første kraftverka på lista.

Grøne sertifikat
Også problematikken omkring innføring av såkalla grøne sertifikat vart grundig drøfta i møtet. Den avtroppande regjeringa la opp til å innføre eit system med grøne sertifikat, ei tidsavgrensa tilskotsordning til all produksjon av ny, fornybar energi, frå 01.01.2007. Den påtroppande regjeringa har, i si samarbeidserklæring, sagt at dei vil gje grøne sertifikat til mikro- og minikraftverk, altså berre opp til ein installert effekt på 1 MW.

Dermed vil mange av dei aktuelle utbyggingane bli ulønsame. Fylkessekretæren i Sogn og Fjordane Sp, Per Rune Vereide, sa at han hadde vore i kontakt med Olje og energidepartementet om saka. Signala der i frå var at dei arbeider med desse problemstilingane, og at den såkalla Soria Moria-erklæringa nok ikkje er i tråd med kva ein eigentleg meinar i denne saka. Det er altså ikkje endeleg avgjort kva regjeringa kjem til å gå inn for når det gjeld grøne sertifikat.

 - Saka engasjerer kollossalt i Sogn og Fjordane, og vår innstilling er at all ny fornybar kraft, også frå oppgradering av eldre kraftverk, må få grøne sertifikat, sa direktør i SFE Produksjon, Ola Lingaas.

 - Skal det vere meining i eit energipolitisk samarbeid med Sverige, slik det er tale om, må det vere ein føresetnad at dei to landa har likt regelverk på dette området, hevda han.

Aksjonsnemnd
Til sist i møtet vart det valt ei nemnd på tre personar til å arbeide vidare med å få til ei samordna utbygging av nettkapasiteten i området, og for å få eit breiast mogeleg påtrykk innover mot sentrale styresmakter når det gjeld vilkåra for utbygging av småkraftverk. Dei tre er Kurt Djupvik, Erik Hope og Jakob Rønnekleiv.

- mheim -