Fekk kjempeaure











       

Fekk kjempeaure i Storefjorden

Laurdag 6. mai om ettermiddagen tok Kenneth Studsrød (46) frå Hyen attende stongrekorden for storefjordsaure. Då fekk den tolmodige sportsfiskaren og trebarnsfaren ein kjempefisk på 5,7 kg.

F.T.: Magnar Heimset

Det er ikkje nokon sensasjon at det vert teke storaure i Storefjorden. På garn har det vore gjort i ”alle år” i varierande mengder. Det som er av nyare dato, er at sportsfiskarane stadig oftare tek skikkeleg store ruggar på stong. I 2002 tok ein florøværing ein fisk på 5,5 kg. Fram til laurdag den 6. mai 2006 var det rekord på stong, men då vart altså rekorden sletta, og den nye er på 5,7 kg.

Mange timar bak
Familien Studsrød bur ved Nesholmen i Hyen, og har tomt med strandline og naust. Kenneth har vore ein ivrig sportsfiskar frå barnsbein av. Han brukar mykje av frihelgane sine i den vesle, delvis sjølvlaga, plastkatamaranen sin. Ettersom det regnar ofte i Hyen, har han laga seg overbygg på båten, som han og har utstyrt med haldarar for stenger og gode sitjeplassar.


Det er lenge mellom kvar gong ein sportsfiskar kan vise fram eit slikt eksemplar av ein storefjordsaure. Denne ruggen på 5,7 kg fekk Kenneth Studsrød frå Hyen på dorging med stong i solskinet laurdag 6.mai 2006.

  – Eg dreg gjerne ut i fire-femtida om ettermiddagen, og det vert ofte over midnatt før eg kjem i land att, så det vert ein del timar i båten. Då er det greitt å ha det litt komfortabelt, fortel Kenneth. Han understrekar at det ikkje vert storfisk på kvar tur. Ikkje kvart år heller, så det ligg mange timar fisking bak ein slik kjempefisk. Men han får mykje fin fisk på eit halvt til to kilo, og han hevdar det er mykje fin fisk å få i vatnet.

Første turen
– Sist laurdag tok eg første turen i år, og den første fisken som beit på sluken, var sjølvaste rekordauren. Heldigvis hadde eg nett sett på nytt, supersterkt power-snøre, som skal tole 13 kg, så eg rekna med det skulle halde. Men ein veit aldri kor solid kroka fisken er, og han drog skikkeleg kraftig, så eg torde ikkje køyre han for hardt. Eg nærmast rygga inn fisken med båten for å spare på snøret. Det er ikkje lang tid ein slik rugg brukar på å slure ut 100 m snøre, og eg likar ikkje at det minkar for mykje på snella. Eg har slite på fisk før fordi snella ha gått tom, og det vil eg helst ikkje oppleve fleire gonger, ler Kenneth, som trur han heldt på i ein halv time før fisken låg trygt i båten.

”Kongen”
Han er veldig glad i å fiske, og tykkjer det er fin avkopling frå jobben. Det er veldig avslappande å kruse rund på dette flotte vatnet og kvile auga på det vakre landskapet rundt. Han har teke eit par ruggar på fire kilo tidlegare, og likte å titulere seg som ”fiskekongen av Storefjorden”.

  – Det irriterte meg grenselaust då ein gutfant på Solheim drog på land ein på 4,5 kg og detroniserte ”kongen”. Seinare fekk ein kompis frå Florø opp ein på 5,5 kg. Han var kry som ein hane, og har mobba meg grundig heile tida sidan. Men han vart still då eg ringde han og fortalde at eg hadde teke heim att rekorden og tittelen, humrar den nøgde sportsfiskaren.