Generasjonsskifte i Hyen brannkorps

Brannsjefen i Gloppen, Einar Holmøy, takka dei avtroppande mannskapa for lang og oppofrande innsats, og han delte ut Gullhjelmen og ein blomsterbukett til kvar av di fem veteranane på tilstellinga på Vågen Motell førre veke.
Frå v.: Anders Aa, Anders Osmundnes, Peder Holme, Einar Holmøy, Anton Aa og Tor Larsen.

Det har vore stor utskifting av mannskap i brannkorpset i Hyen i det siste. Fem av dei ti brannmannskapa takkar av og vert erstatta med nye, og korpset får ny brannmeister. Dette vart markert med ei tilstelling på Vågen Motell torsdag 07. februar 2008.

F.T.: Magnar Heimset

Det har føregått eit generasjonsskifte i brannkorpset i Hyen ei tid no. Heile fem av veteranane, som vart rekrutterte på 60- og 70-talet, går av etter lang og tru teneste og vert erstatta med nye. Brannmeisteren gjennom over 40 år, Peder Holme, har fylt 70 år og takkar av, og ny brannmeister vert nøyaktig halvparten så gamle Arne Kåre Rønnekleiv Holme. Utskiftingane har gått over litt tid, men i førre veke var det ei felles markering med ei samkome på Vågen Motell der dei avtroppande mannskapa vart heidra med utdeling av Gullhjelmen og blomsteroverrekking.

Deltidsarbeid
Brannvesenet i Gloppen er organisert som deltidsbrannvesen og blir administrert av teknisk sjef som også er brannsjef. Det er brannstasjonar i Hyen, på Byrkjelo og på Sandane. På Byrkjelo er det tolv brannmannskap og to brannbilar, i Hyen er det ti brannmannskap, ein brannbil og ein bergingsbil, og på Sandane er det 20 brannmannskap, to brannbilar, ein bergingsbil og ein tankbil.

Brannmeister i 40 år
Peder Holme har vore brannmeister i Hyen i over 40 år. Han har hatt sitt daglege virke i Holme Bilverkstad like lenge, sidan verkstaden vart bygd i 1963. Han overtok etter far sin, Nils ”Smeden” Holme, som var ein institusjon i bygda som maskinkyndig smed og drosjeeigar i ein mannsalder. No får Peder velfortent avløysing av yngre krefter, og 35 år gamle Arne Rønnekleiv Holme overtek som brannmeister og sjef for dei ti brannmannskapa.

Ei stor utfordring
– Eg ser dette som ei stor utfordring og ei spennande oppgåve. Det kjennest litt rart å gå på som sjef sidan eg ikkje har vore med i korpset før. Eg laut ha litt omrømingstid før eg sa ja då branningeniør i kommunen, Arne Mykland, spurde meg. Eg har stor trong for kursing, og skal på røykdykkarkurs i Florø i løpet av våren. Alle i korpset skal ha meir kursing. Elles har vi faste øvingar den første tysdagen i åtte av årets månader, fortel den nybakte brannmeisteren.

Holme bur sentralt i Hyen og trur det er ei medverkande årsak til at han vart spurd. Han er utdanna røyrleggar og er arbeidsformann og ansvarleg for røyravdelinga ved Br. Aa i Hyen. Han er klar over at han kan støyte på litt av kvart av utfordringar i jobben som brannmeister, men set si lit til at mange av dei ni andre i korpset har lang røynsle. Brannbilen i Hyen har passert 30 år og er moden for utskifting. Holme fortel at dei er lova ”ny” bil i 2009. Då skal ein av bilane på Sandane skiftast ut, og Hyen får overta ein derifrå.

Påtroppande brannmeister i Hyen, Arne Rønnekleiv Holme, er utdanna røyrleggar og er arbeidsformann og ansvarleg for røyravdelinga ved Br. Aa i Hyen. Her koplar han slangar i maskinrommet på ein av dei nye båtane.

Ingen damer
– Det er ingen damer mellom mannskapa dine, har du som ny brannmeister tenkt å gjere noko med det?
– Det er vel på tide å få damene med også på dette feltet. Eg fryktar at her ikkje er så mange som vil og kan, men vi ser gjerne at det kjem damer med. Det er vel ei sak for branningeniøren i kommunen, Arne Mykland, å arbeide med. Det er han som har ansvar for rekruttering, meinar Holme.

Gullhjelmen
På tilstellinga på Vågen Motell var alle frammøtte, både nye og eldre av brannmannskapet. Frå kommunen møtte brannsjef Einar Holmøy, varabrannsjef Runar Kleppe og branningeniør Arne Mykland. Holmøy takka dei avtroppande mannskapa for lang og oppofrande innsats, og han delte ut Gullhjelmen og ein blomsterbukett til kvar av di fem veteranane. Etterpå vart det servert snittar, kake og kaffi.