Hyen barnehage feirar 25 år

Solveig Hope har stort sett vore styrar i Hyen barnehage heilt frå starten i 1986 til han vart slegen saman med skulen med felles styrar. Her er ho i Samfunnshuskjellaren saman med nokre av ungane i 2005. Borna er Ørjan Rygg (på fanget), Solveig Vonheim Heimsæter, Malene Holme og Synnøve Elisa Rønnekleiv.

I år rundar Hyen barnehage 25 år. Det har dei tenkt å markere med ei tilstelling i den nye barnehagen tysdag ettermiddag.
  – Vi held ope hus, og då er alle hjarteleg velkomne til å sjå seg om og til eit par hyggjelege timar, seier pedagogisk leiar, Solveig Hope.

Hyen barnehage inviterer til 25-års jubileum i den nye barnehagen tysdag etter middag. Då held dei ope hus og vil vise lysbilete og orientere frå barnehagen si soge. Det vert òg matservering som vil gå føre seg ute om vêret tillet det.

Den andre i kommunen
Hyen fekk sin eigen barnehage i 1986. Det var då den andre barnehagen som vart oppretta i Gloppen kommune. Opptakten var at bygda hadde barn med spesielle behov som gjorde barnehage særleg aktuelt.

  – Vi fekk leige kjellaren i Hyen samfunnshus og starta opp der med korttidsbarnehage tre dagar i veka. Barnehagen vart i starten godkjent for 16 born, seinare vart det 18 i ei gruppe. Men barnetalet varierte ein del frå år til år. Stort sett hadde vi mellom 14 og 18 born dei første åra, seier Solveig Hope. Ho har stort sett vore med heile tida, bortsett frå nokre permisjonar. Ho var først styrar i 14 år, seinare har ho vore pedagogisk leiar. I ein periode med få born vart barnehagen ei avdeling av skulen og med rektor som styrar.

Nært samarbeid
– Vi har hatt fordelen av nærleik til skulen og har hatt eit greitt samarbeid med dei. Tidleg på 90–talet vart det oppretta ei førskulegruppe som brukte lokala dei ledige dagane. I 2005 vart opningstida i barnehagen auka til heildagsbarnehage tre dagar for veka, året etter til fire dagar i veka. I februar 2008 vart det opna ei småbarnsgruppe i lokala i Gymbygget som før vart brukt til legekontor, opplyser Hope.

Ny barnehage
I den seinare tid har barnetalet i bygda, og dermed etterspørselen etter barnehageplassar, auka. Lokalitetane i Samfunnshuset og Gymbygget var ikkje særleg godt eigna, og kunne slett ikkje romme så mange born. Det vart difor arbeidd hardt i fleire år for å få bygt ny barnehage. 

I fjor vår kunne omsider ein ny, fin barnehage takast i bruk med høgtidleg overlevering i mai. No er det 27 born i barnehagen med smått og stort, og personalet er stolte over å kunne invitere til jubileum i dei flotte lokala.