Kosekveld med delikatessar frå havet

Omlag 140 matglade gjestar fekk verkeleg nyte smakfull kvalitetsmat frå havet.

Laurdag 26.04.03 laga Hyen Jeger og Fiskarlag i smarbeid med Kokkenes Mesterlaug til ein festleg kosekveld der delikatessar frå havet stod på menyen "krydra" med fornøyelege jaktsoger fortalt av lokale jegerar.
Den etter kvart så velkjende faglærar Steinar Lindstrøm stilte med ein imponerande kokke-kvintett frå lauget med oldermann Anne Grethe Førde i spissen.
Ho hadde med seg kokk Gro Hof Morthensbakke, faglærar Ole Jørgen Skallebakke og kokkelev Ingrid Andersbakke.
På menyen stod ein stor forrett av ulike variantar av regnbogeaure frå Hyen, varmrøykt, sylta og grava, pluss litt smågodt av reke, blåskjel, kaviar og salat. Hovudretten var basert på kvitfisk, pochert torsk, sei baka i saus og løk, uer i karri og pasta og ei utruleg god fiskesupa. Mmmmmmmm . . .

Anfinn Solheim var med og "serverte" spennande jaktsoger mellom hovudretten og kaffi&kaker.

Og til avslutning drog Hyen Spelemannslag opp til dans med innslag av både swing og tango.

- mheim -