Våningshus på Solheim brann ned

Det var det eine av dei to våningshusa i Inigarden som brann ned til grunnen laurdag kveld.

100 år gamalt våningshus brann ned
Laurdag 28.august brann våningshuset på ein gard på Solheim i Hyen ned til grunnen. Brannen starta omlag kl. 20.00 ved at ein vedkamin med glasfront eksploderte og spreidde brennande kjeppar og glør utover golvet. På det tidspunktet var berre ein 13 år gamal gut heime. Han rakk å late att glas og dører og kome seg uskadd ut. Heldigvis hadde han mobiltelefonen i lomma og fekk varsla brannvesenet med ein gong.

Også døra og veggen på garasjen/masstova tvers over vegen tok delvis fyr i den intense heten.

Brannkorps både frå Hyen og Eikefjord
Omlag ein halvtime etter var brannkorpsa på plass både frå Hyen og Eikefjorden. Tankbilen frå Eikefjorden rommer store mengder vatn, og med det greidde brannfolka å hindre at brannen spreidde seg til andre bygningar på garden. Særleg var ein garasje/masstove rett over vegen for bustadhuset utsett.

Sjefen for brannkorpset i Hyen, Peder Holme, rosa mannskapa både frå Hyen og Eikefjorden som greidde å hindre at brannen spreidde seg til andre bygningar i tunet. Våningshuset var uråd å berge.

Tilkomsten til vatn
Brannmeisteren i Hyen, Peder Holme, fortel at tilkomsten til nok vatn er vanskeleg på Solheim som på mange andre gardar i Hyen. Dei måtte heilt i Storelva på Solheim, 300 - 400 m vekke for å få tak i vatn. Han kunne og tenkt seg å vere utstyrt med eit reserveaggregat for arbeidslys sjølv om dette ikkje var største problemet denne gongen. Korpset frå Eikefjorden hadde nemleg med seg slikt utstyr.

Også ein traktor som stod på tunet vart øydelagd i brannen. Lyklane hang i kjøkenet. . .

Ingenting vart berga
Våningshuset, som tilhøyrde Oda og Jan Harald Pedersen, var frå 1901 og var renovert fleire gonger. Siste store opprustinga var i 1988 då det m.a. vart etterisolert og fekk nytt tak, og det var no i svært god stand. Det brann heilt ned til grunnen, og ingenting vart berga ut. Til alt hell kom ingen personar til skade i den eksplosjonsarta brannen.

- mheim -