Hyen kombinerte barne- og ungdomsskule best i landet

Dette jenter 16 år-laget vann sonemeisterskapen for Nordfjord i 2002 med fleire yngre spelarar på laget, og dei kom til 16-delsfinalen i Norway Cup. Men hyejenter kan meir enn å spele fotball . I denne gjengen finn vi dei fleste elevane i avgangsklassen 2002 ved Hyen kombinerte barne- og ungdomsskule.     Foto: Rune Fossum

Avgangsklassen  2002 ved Hyen kombinerte barne- og ungdomsskule toppar den nyleg offentleggjorde statistikken over gjennomsnittskarakterar ved ungdomsskulane i landet. Verdien av statistikken er omstridd, og fungerande rektor ved skulen, Anders Osmundnes, er forsiktig og lojal mot Utdanningsforbundet si offisielle, kritiske haldning. Han prøvar å "tone ned" det heile med å seie at karakterar ikkje seier alt om kvaliteten i skulen, og at dei vil variere mykje frå år til år.

I Hyen på nett har vi ei anna oppfatning av situasjonen. Det er eit faktum at skulen har beste snittkarakter i landet i 2002. Neppe tilfeldig, spør du oss. Dette er ei stadfesting av det vi har visst lenge. Hyarane er flinke og driftige folk. Heimane er gjennomgåande stabile, og det sosiale miljøet i bygda er godt og  med liten alderssegregering. Skulen er liten og har eit godt læringsmiljø både takka vere greie elevar og dugande, godt kvalifiserte lærarar.

Kvifor skulle vi undrslå dette? I ei tid då sentralisering og effektiviserig er to ord som ser ut til å bli oppfartta som synonyme. Det skal fusjonerast og rasjonaliserast på alle frontar og baugar, og det som ikkje på papiret kan oppvise lønsemd i kroner og øre skal bort. Det er på høg tid å stoppe opp og prøve å analysere og finne ut kva vi tapar av andre verdiar i dette heseblesande lønsemdsjaget.

Det er neppe tilfeldig at det er dei små skulane som kjem best ut i denne statistikken. Vi er samde i at karakterane ikkje seier alt om kvaliteten i skulen, men dei seier noko vesentleg om kunnskapsnivået. Så får vi ta med oss at gjennomsnittet nok vil variere frå år til år, og at variasjonen truleg vil vere størst ved dei små skulane.

Vi legg ved ein tabell over dei 199 beste u.skulane i landet saksa frå VG Nett     http://www.vg.no

- mheim -

Skoletoppen