Bertel Oddne Mjellem på Kongelaget

Bertel Oddne Mjellem er mellom dei 15 femteklassingane som får skyte på Kongelaget på Landsskyttarstemnet i Målselv laurdag. Hyaren skaut 244 poeng og fekk ein 13. plass i det gode selskapet.

- Eg skaut ikkje før litt ut på dagen, og vart nok litt smånervøs av å sitje i teltet og høyre på resultata i radioen etter kvart som laga skaut. Dei beste fekk 247, så eg rekna med eg måtte ha 245 for å kome med på Kongelaget, fortel den sindige, men nøgde stor-skyttaren til Hyen på Nett.

Gode forhold
- Veret og tilhøva var bra, og eg var bra innskoten. Men ståande-serien sat litt høgt, og eg fekk nokre taparar der. Det førte til at eg skjerpa meg på kne og på grunnlaget, så summen vart bra likevel. Eg trudde ikkje det heldt til plass på Kongelaget, men etter kvart som fleire og fleire kongeemne datt igjennom, steig håpet, smiler han.

Skive 13
- Kva trur du om å skyte på skive 13, er du overtruisk?


Bertel Oddne Mjellem er den andre hyaren som får skyte på Kongelaget i eit landsskyttarstemne. Ole Arild Aa hadde 245 poeng og skaut på skive 10 på Evje i 1999. Han fekk berre 97 på omgangen og hamna på 342 og ein 20.plass.

  - He-he. Nei, eg er gift med ei dame som er fødd på den 13. så det talet har eg god røynsle med. Laurdag må eg ha ti gode skot i blinken for å få ei bra plassering.

  - Dei beste, to jenter, har 247. Det kan vel bli bort i mot vanskeleg?

  - Det trur eg blir umogeleg. Eg håpar sjølvsagt på 100 på omgongen og ei best mogeleg plassering, men det er alltid nokre av dei med meir poeng enn meg som skyt 100. Det hadde forresten vore artig med ei skyttardronning for første gong i historia, seier ein nøktern Bertel Oddne Mjellem på telefonen frå Målselv i Troms. Vi kryssar fingrar og ønskjer lukke til.

- mheim -