Årsmøte for sprek 100-åring

Fredag den 13. januar var det årsmøte i Hyen Idrettslag for hundrede gong. Laget feirar nemleg 100-årsjubileum i år, og må seiast å vere ein høgst oppegåande og sprek 100-åring.

Leiaren i Hyen Idrettslag, Matias Hope (t.v.) overrekte velfortente blomar til avtroppande tillitsvalde med sers ulik fartstid i laget sine styrande organ. Torbjørn Holme har meir enn ein mannsalder bak seg både som aktiv idrettsutøvar og som tillitsvald, Tor Øyvin Aa , noverande sekretær i arbeidsutvalet og avtroppande oppmann for  fotball jenter, har middels fartstid i laget, Rigmor Hafstad Gjengedal gjev seg etter berre eitt år som leiar i friidrettsgruppa, og Jørgen M. Holme takkar av som medlem av same gruppa. Han hevdar å ha over 50 år samanhengande bak seg som aktiv og tillitsvald i laget.

Hyen Idrettslag må seiast å vere ein sprek 100-åring. Den 6. februar er det nøyaktig hundre år sidan laget vart skipa. Mykje av laget sitt årsmøte sist fredag kveld dreia seg om førebuinga til jubileumsfesten, som et tidfesta til laurdag 1. april. Elles var årsmøtet prega av at jubilanten er ein sers oppegåande og sprek hundreåring med god aktivitet og ein sunn økonomi.

Gode på toppen og i botnen
– Vi er gode på toppen og botnen, sa leiaren i laget, Matias Hope, ved gjennomgangen av ei imponerande fyldig og forseggjort årsmelding. Han sikta til at laget har seniorløparen Roger Aa Djupvik heilt i vasskorpa til verdseliten i langrenn, 18-årige Benedikte Aa mellom dei beste juniorane i landet, Morten Aa Djupvik som trenar for elitelandslaget i langrenn og 16-årige Kristine Gjengedal mellom dei beste i landet i sin klasse i slegge. På krinsnivå er deltakinga svak på ski og moderat i friidrett, men deltakinga på laget sine lokale arrangement er svært god, særleg i dei yngre årsklassane.

Velordna økonomi
Kasserar Eldar Rønnekleiv la fram ein rekneskap som viser at laget har, om ikkje akkurat romsleg økonomi, så i alle fall ein sers ryddig økonomisk situasjon der ein set tæring etter næring. Bruttoomsetninga i 2005 var på vel 342.000 kroner med eit lite overskot på litt over 34.000. Dette siste grunngav han med at tilskotet til leikebakken på Høgdene kom til utbetaling dette året, elles ville det høge aktivitetsnivået ført til eit tilsvarande overforbruk.
– Ein omfattande dugnadsinnsats saman med støtte frå sponsorar, kommunen og andre bidragsytarar er avgjerande for idrettslaget sine aktivitetar, står det m.a. å lese i årsmeldinga, som vart godkjent med få merknader.