– No skal Rv 615 gjennom Hyen setjast på dagsorden

Den mannsterke arbeidsgruppa på fire til å arbeide for sikring og opprusting av Rv 615 gjennom Hyen fekk eit detaljert mandat å halde seg til. For å symbolisere kor viktig det er med sikring, fekk dei utdelt kvar sin hjelm med 615 på. Frå v.: Kommunepolitikar Ola Holme, leiar i Utviklingslaget Kjartan Aa Berge og kommunepolitikar og dagleg leiar i Hyen Bygg Olav Klungre. Lastebileigar Arve Aasen er og med i gruppa, men var ikkje til stades.

På årsmøtet i Hyen Utviklingslag i førre veke vart det nedsett ei arbeidsgruppe til å arbeide for å få fortgang i sikring og opprusting av Rv 615 mellom Storebru og Sandane gjennom Hyen.
  – No skal riksvegen gjennom Hyen setjast på dagsorden, sa leiaren i laget, Kjartan Aa Berge.

F.T.: Magnar Heimset

Hyarane er leie av å måtte køyre på den smale, svingete og mange stader direkte farlege riksvegen gjennom bygda. No krev ein fortgang i arbeidet med betre sikring med rekkverk, rasførebygging og opprusting av fylkets dårlegaste riksvegstrekning. Ei arbeidsgruppe på fire personar er nedsett for å syte for å få sett vegstrekninga på dagsorden og på dei aktuelle prioriteringslistene snarast råd.

Hovudsak på årsmøtet
Hyen Utviklingslag har mange viktige saker på sakskartet sitt. Utbetring av RV 615 var ei av hovudsakene på årsmøtet i laget nyleg, og det vart nedsett ei arbeidsgruppe på fire personar til å vere pådrivarar for å få noko gjort med denne vegstrekninga straks. Årsmøtet utarbeidde eit mandat for arbeidsgruppa i to hovudpunkt.

Det var stor semje mellom dei omlag 30 frammøtte på årsmøtet i Hyen Utviklingslag nyleg, om at det som hastar aller mest er betre sikring med rekkverk i den livsfarlege Hopsstranda.

Sikring
Det var stor semje mellom dei omlag 30 frammøtte hyarane om at det som hastar aller mest er betre sikring med rekkverk i den livsfarlege Hopsstranda. Enkelte var redde for at eit omfattande arbeid med rekkverk ville kunne seinke arbeidet med ei varig løysing med tunnel forbi den rasfarlege strekninga. Men det vart poengtert at ein ikkje kunne akseptere å vente på tunnel før nødvendig sikring med rekkverk vert gjort. Denne strekninga er så farleg at sikringsarbeid må gjerast omgåande.

  Vidare vart det kravd betongrekkverk langs den verste vegstrekninga langs fossen i Hopsbrekka. Det enkle autovernet som er der no er ikkje nok til å halde tunge bilar på vegen om dei kjem på glid på glatt føre. Bussjåførar som køyrer denne vegen dagleg, hevdar at nettopp Hopsbrekka langs fossen er den farlegaste staden på heile Rv 615.

  Rassikring i Hyestranda er i god gjenge, og fonna som oftast har ført til vegstenging, Skasvora, er sikra med overbygg. Arbeidsgruppa skal arbeide for at også resten av det planlagde sikringsarbeidet mellom Holme og Kleppenes vert gjort så snart som muleg.

Opprusting
Når det gjeld opprusting av vegen vart tunnel til Hope sett øvst på prioriteringslista. Ein ser tunnel som den einaste akseptable framtidsløysinga forbi den rasutsette strekninga i Hopsstranda. Korleis dette best kan gjerast, vil ein ha detaljerte meiningar om etter kvart som planleggingsarbeidet går fram.

  Dinest må vegen utvidast ved Høgemuren mellom Heimsetkrysset og Nesholmen. Her er det veldig smalt og uoversiktleg, og kollisjonsfaren er stor.

  Mandatet peikar elles på fleire konkrete stadar der opprusting av vegen er nødvendig. Ein krev ”normal” riksvegstandard på heile strekninga mellom Hyen og Storebru både når det gjeld kurvatur, vegbreidde og dekke.

  Det vert og peika på at det daglege vegvelikehaldet har vorte dårlegare etter at det vart sett ut på anbod.

Hyen Utviklingslag med mange viktige saker på kartet

Styret i Hyen Utviklingslag som vart valt på årsmøtet onsdag kveld: Frå v.: Jan Nordal, leiar Kjartan Aa Berge, nestleiar Sivert Jan Ommedal, Grete Vonheim og Nils Eimhjellen, alle attvalde. Nyvalde Oddrun Ommedal var ikkje til stades.

Årsmeldinga som vart presentert og godkjent på årsmøtet i Hyen Utviklingslag nyleg viser stor aktivitet med mange viktige saker i laget. Fleire av dei ser no ut til å finne si løysing.

Hyen Utviklingslag er med og set dagsorden i bygda og kommunen, og laget får ting til å skje. Det viser årsmeldinga som vart lagt fram på årsmøtet som vart halde i Hyen Samfunnshus i førre veke.

Breiband
Arbeidet med å skaffe breiband til heile bygda har vore ein prosess som har teke lang tid, men no ser det endeleg ut til at arbeidet vert krona med hell og at den saka er i boks. Gloppen kommune, Telenor og SFE har inngått eit samarbeid som vil gje breiband på fiberkabel til begge dalane i Hyen i tillegg til Hyen sentrum i løpet av 2007. Årsmeldinga uttrykkjer stor glede over dette.

Barnehage
Saman med ei foreldregruppe har Utviklingslaget arbeidd med å finne tomt til- og få bygt ny barnehage i Hyen. Tidlegare har kommunen leigt barnehagelokale i kjellaren i Samfunnshuset, men desse er ikkje særleg eigna til føremåler, særleg ikkje for born heilt ned i eitt års alder. Også denne saka ser ut til å gå mot ei løysing, og det er godt håp om å få bygt ny barnehage i løpet av 2008.

Gigantlinja
Saka om bygging av ei 420 kV kraftlinje mellom Fardal i Sogn og Ørskog på Sunnmøre der fleire aktuelle trasear er vurdert å gå gjennom Hyen, har vore ei høgst aktuell sak for Utviklingslaget i året som gjekk. Laget har vore aktivt i å få ut informasjon om konsekvensane av linja. Ein har utarbeidd høyringsuttale om saka der ein går klart i mot å få ei slik gigantlinje gjennom bygda, går det fram av meldinga.

Vegstandarden
Vegstandarden i Hyen har vore eit stort tema i året som gjekk, og vil måtte vere det i lang tid framover. I januar i år arrangerte laget og kommunen ein vegkonferanse med stor politisk deltaking, til og med av stortingspolitikarar. Grunnlaget for arbeidet vidare med saka vart vesentleg styrka på dette møtet, ikkje minst takka vere det store engasjementet frå bygda.

  Vidare peikar årsmeldinga på det gledelege i at fleire nye familiar flytta til Hyen siste året, m.a. ei frå Nederland. Ein fekk og til ei ny utgåve av bladet Hyen-Nytt som ein meiar vart ei informativ, interessant og god avis. Ein gledar seg og over at hjørnesteinsbedrifta Br. Aa gjer det svært godt for tida og treng fleire folk.