ARSMELDING SKIGRUPPA 2002

Styret:

Martin J. Ommedal leiar
Kurt Djupvik sekretær
Magnar Heimset løypesjef
Atle Hjelle
Tor Øyvin Aa

 

Dette var året då det kom snø nok til skigåing tidleg. Første prepareringar i lysløypa vart utført 08. november og nokre dagar sist i månaden med fine løypetilhøve. Etter snøfallet litt før jul var det stort sett høve til å gå på ski til langt ut i april.

Som året før er det Roger Aa Djupvik og Benedikte Aa som har markert seg sterkast i konkurransar. For Roger var det første sesongen som seniorløpar. Han hadde likevel mange gode plasseringar både nasjonalt og internasjonalt, mellom anna ein 2. plass i ungdomsmeisterskapen opp til 23 år. Som TV-sjåarar vil vi nok minnast best stafetten i NM der han gav oss ei stor oppleving i nappetaket med Frode Estil på 2.etappe.

Benedikte var, som året før, suveren i si klasse på krinsplan. På Hovudlandsrennet var ho sjuk, men oppnådde likevel ein fin 6.plass i friteknikk. Den klassiske distansen dagen etter måtte ho stå over. Men ho kom sterkt attende i Ungdomsstafetten i Holmenkollen der ho gjekk ein flott 1.etappe og veksla som nr.8 trass start i 2.rekkja.

Marlin Aa har hatt god framgang denne sesongen, med mange fine resultat på krinsrenn og solid innsats i Ungdomens Holmenkollrenn. Janne, Kristine og Ida Gjengedal har og fine resultat på krinsrenn. Sameleis Ole Andre Aa.

Skigruppa takkar for flott innsats av dei fine representantane for laget og bygda. Lukke til vidare!

Hyesprinten 16. Februar vart nok litt skjemd av dårleg ver, men gode spor og realt klisterføre møtte dei utruleg mange løparane som likevel møtte fram. Rennet gjekk greitt i år og, takka vere den veltrimma funksjonærstaben som årvisst stiller opp.

Dei fire karusellrenna har hatt god deltaking. Som før er det borna som er flinkast til å møte opp. Vi oppmodar fleire vaksne til å vere med. Her er det ikkje krav til prestasjonar som tel mest, men gleda ved å gå på ski i eit triveleg fellesskap. Stor takk til foreldra og idrettsskulen for all hjelpa under desse renna.

Stafett med miksa lag av jenter og gutar, var eit nytt tiltak av året. I fint ver hadde tre lag ein uhøgtideleg, men spennande konkurranse i den lettaste delen av lysløypa.

Begge lagsmeisterskapa måtte avviklast i lysløypa. LM lang løype var planlagt i Gjengedalsmarka. Men mildver, mjuk og roten snø gjorde det vanskeleg å få til brukande løyper der.

På Skisportens dag 11. mars var det godt ver og godt frammøte. Stor aktivitet i skileikbakken og løypene, nysteikte vaflar og bålgrilla pølse var med og gjorde dagen til det han er tenkt til; ein triveleg og inspirerande skidag med vekt på det sosiale samværet som viktigaste målet.

Takk for godt samarbeid med trim- og merkeutvalet og idrettsskulen.

Hyen skule og Hyen IL fekk tilbod frå Skikrinsen om å vere med i prosjektet "Langrenn i skulen". Skigruppa si oppgåve var å tilrettelegge aktivitetsområde og å skaffe instruktørar. Morten, Roger og Erik saman med Matias og andre frå skulen stilte velvilleg opp.

Det var tilsaman sju samlingar på Fullskjegga og ein skidag i Gjengedalsmarka. Opplegget var vellukka, og vi fekk inntrykk av at elevane sette pris på tiltaket.

Birkebeinarrennet var i år 23. mars med 12 deltakarar frå Hyen (sjå resultatliste).

Vi hadde ein kjemefin tur med buss til og frå og flott ver og føre. Takk til Jan Harald, som i tillegg til å gå rennet, stilte som påliteleg sjåfør.

Fagmøte – langrenn vart halde på Skei 31. oktober med ein stor kontingent skiinteresserte hyarar til stades. Kurt, Morten, Tor Øyvin, Martin, Matias, Kåre, Jan Harald, Oddvin og begge Erik-ane møtte der.

Skigruppa takkar alle som på ulike måtar hjelpte til i sesongen 2001/2002. Utan god hjelp frå mange, så rakk vi ikkje langt. Takk til løypemannskapa for stor og velvilleg innsats i Lysløypa og i Gjengedalsmarka. Vi vonar at enno fleire vil nytte dei gode tilhøva for skiaktivitet som vi er så heldige å ha i bygda. Lukke til med ein ny vinter!